Paketearen definizioa [San Telmo Museoa / Škoda - Abonamendua] - Donostia Kultura

Julius Rodriguez

Julius Rodriguez (piano-jotzailea)

Julius Rodriguez piano-jotzailea, bateria-jotzailea, beste zenbait instrumenturen jotzailea, konpositorea eta produktorea White Plains-en (New York) jaio zen 1998an, eta Los Angelesen bizi da gaur egun. Estatu Batuetako jazz-belaunaldi berriko figurarik zirraragarrienetako bat da. Manhattan School of Music Precollege eta, ondoren, Juilliard School izeneko eskoletan jaso zuen prestakuntza, eta bere talentu goiztiarrari esker, New Yorkeko klubetan jo eta talde profesionaletan parte hartu zuen. Talde horietan, berehala nabarmendu zen haren moldakortasuna.

Muga-izaerako artista da berez, jazz garaikidea, gospela, rhythm & bluesa, hip hopa eta musika elektronikoa lotzen ditu naturaltasun harrigarriarekin, eta identitate propioa proiektatzen du beti. Irekitasun estilistiko horri esker, izaera desberdineko musikariekin aritu ahal izan da. Haien artean, honako hauek aipa daitezke: Wynton Marsalis, A$AP Rocky, Kassa Overall, Meshell Ndegeocello, Roy Hargrove eta Carmen Lundy. 61. Jazzaldian, azken horrekin arituko da berriz (Victoria Eugenia Antzokian, uztailaren 22an, 18:00etan).

Julius Rodriguezen diskografiak etiketetatik ihes egiten duen ikuspegi ireki eta dinamiko bat islatzen du. Juliusentzat, jazza inprobisaziorik ausartena, hiri-pultsua, poparen sentsibilitatea eta gospelaren espiritualtasuna elkartzen diren espazioa da.

Informazio gehigarria

Salmenta baldintzak

Bruce Barth & Vicente Archer

Bruce Barth (pianoa), Vicente Archer (kontrabaxua)

Bruce Barth piano-jotzailea eta Vicente Archer kontrabaxu-jotzailea jazzaren nazioarteko agertokietan jotzeko eskaera gehien jasotzen dituzten musikarietako bi dira. Elkarrekin, bikote modura, jazzeko obra klasiko batzuen ikuspegia eta konposizio propio batzuk eskaintzen dituzte.

Kalifornian jaioa baina New Yorkeko ingurune asaldatuan hezia, Bruce Barth jazz garaikidearen erreferentziazko piano-jotzailetzat hartzen da duela hamarkada batzuez geroztik. Musika-prestakuntza sendoa jaso ondoren, oso gaztea zela hasi zuen bere ibilbide profesionala, eta Stanley Turrentine, Terence Blanchard, Stan Getz, Freddie Hubbard, Phil Woods eta Tony Bennet ospetsuekin jo zuen, besteak beste. Barth, halaber, konpositore, produktore eta pedagogo gisa nabarmendu da, eta nazioarteko kritikak goraipatu du. Adibidez, The New York Times egunkariak bere belaunaldiko piano-jotzailerik interesgarrienetako bat zela nabarmendu zuen. Gainera, diskografia zabala du, ohikoa da mundu osoko jaialdietan, eta kideen, publikoaren eta prentsa espezializatuaren ahobatezko errespetua jaso du.

Vicente Archer oso sormen handiko kontrabaxu-jotzaile berezi gisa nabarmentzen da. Kolaborazioak egin ditu Donald Harrison, John Scofield, Norah Jones, Pat Metheny, Brad Mehldau, Wynton Marsalis, John Scofield, Kenny Garrett eta jazzaren esparruko beste izen handi askorekin.

Informazio gehigarria

Salmenta baldintzak

Benito Gonzalez

Benito Gonzalez (pianoa)

Jazzaren ondarea horizonte berrietara bultzatzen duten pianista horietako bat da Benito Gonzalez. Instrumentuarekiko bere pasioak eta sormenak leku gailen batean kokatu dute egungo panoraman, piano garaikidearen esploratzaile nekaezin gisa finkatuta.

Great American Jazz Piano Competition saria irabazi zuen 2005ean, eta 2020an Steinway & Sons artista izendatu zuten bere musika blaitzen duten indar erritmiko eta molde afro-latinoengatik. Venezuelan jaio eta New Yorken bizi den pianista hau bere herrialdeko folklore-soinuen artean hasi zen, Herbie Hancock, McCoy Tyner, Chick Corea eta Keith Jarrett bezalako figuren eragina jaso aurretik.

AEBn hasi zuen bere karrera, Washington D.C.n, Okyerema Asante maisu ghanarrarekin jotzen. Han bizitzea erabaki eta ekin zion bere ibilbideari 2003an Jackie McLeanekin eszenatokia partekatzen. Handik gutxira, Kenny Garretten laukoteko kide izatera igaro zen; zazpi urtez jo zuen taldearekin, Grammy sarietarako bi izendapenek markatutako etapa batean. Geroago, Azar Lawrencerekin kolaboratu zuen, eta 2019an Pharoah Sanders mitikoarekin elkartu zen pianista eta musika-zuzendari gisa.

Informazio gehigarria

Salmenta baldintzak

Benjamin Moussay

Benjamin Moussay (pianoa)

Moussay, Estrasburgon jaioa, teklatuaren aztia, espazioen modelatzailea eta irudimen handiko piano-jotzailea dela esan ohi da, ukitu sentsual bat eta erraz identifika daitekeen ikuspegi paregabe bat agertzen dituena.

Benjamin Moussay, lehenik eta behin, piano klasikoan graduatu zen Estrasburgoko Kontserbatorioan. Ondoren jazza ikasi zuen Parisko Goi Mailako Kontserbatorio Nazionalean. Jazz Martial Solal nazioarteko piano-lehiaketaren eta La Défenseko Jazz Lehiaketa Nazionaleko bakarlari onenaren sariaren irabazlea izan zen, eta jotzeko eskaera gehien jasotzen dituzten Frantziako jazzeko piano-jotzaileetako bat da gaur egun. Musikari handiekin egin dituen kolaborazioek horixe berresten dute. Haien artean, honako hauek aipa daitezke: Louis Sclavis, Marc Ducret, Daniel Humair, Tony Malaby, Steve Swallow, Michel Portal, Vincent Peirani, Martial Solal, Youn Sun Nah, Airelle Besson...

Beste artista batzuekin eta beste artista batzuentzat jotzeaz gain, Eric Echampard-ekin eta Arnault Cuisinier-ekin osatzen duen hirukotearen eta Claudia Solalekin osatzen duen bikotearen buru da Moussay. Bakarlari gisa, ECM konpainiarako piano hutsez disko bat grabatu zuen Frantziako bigarren piano-jotzailea izan zen: Promontoire (2020) diskoa izan zen, hain zuzen ere. Halaber, irakaslea da eta antzerkirako eta filmetarako -bereziki zinema muturako- konposatzen du.

Salmenta baldintzak

Emile Parisien & Vincent Peirani - Abrazo

Émile Parisien (saxofoi sopranoa), Vincent Peirani (akordeoia)

Émile Parisienek saxofoian eta Vincent Peiranik akordeoian osatutako bikotea Europako Jazz garaikidearen kolaborazio nabarmenetakoa da. 2010ean lehen aldiz elkartu zirenetik, beren konexio musikalak bilakaera handia izan du, Jazzaren panoraman elkar hartze emankor eta miretsienetakoa bihurtzeraino. 1.000 kontzertu baino gehiago eman dituzte elkarrekin, eta horietatik 600 baino gehiago bikote formatuan izan dira; horrela irmotu da darien kimika berezia agertokietan.

Beren lehen albuma, Belle Époque (2014), Sidney Bechet saxofonistari egindako omenaldia izan zen, munduko agertoki ospetsuenetan aritzera eraman zituena. Lan horrek sari ugari jaso zituen, besteak beste, Echo Jazz eta Les Victoires du Jazz.

Sei urteko prestaketa aldiaren ondoren, Abrazo (2020) bigarren diskoa iritsi zen, tangoaren dotorezian, malenkonian eta indarrean oinarritutako proiektua. Abrazon, bikoteak maisuen konposizioak berrasmatzen ditu, tartean Astor Piazzolla, Tomás Gubitsch eta Xavier Cugatenak. Gainera, albumak Kate Bush bezalako artisten moldaketa harrigarriak biltzen ditu, baita bikotearen konposizioak ere. Diskoaren hasierako piezak, Jelly Roll Mortonen “The Crave”-k, zubi sotil bat ezartzen du Belle Époquerekin (2014), bi albumak esperientzia musikal osatu batean elkarren segidan entzuten den suite bilakatuta.

Informazio gehigarria

Salmenta baldintzak