Paketearen definizioa [Kursaal Auditorioa - Abonamendua] - Donostia Kultura

Samara Joy

Jazzaren historian oso pertsona gutxik bizi izan dute Samara Joyrena bezalako igoera bizkorra, eta are gutxiago hain gazte izanda. 26 urte besterik ez dituela, bikaina da orain arte egin duen ibilbidea.

Bost Grammy sariren irabazle, Best New Artist saria barne, lehen mailako presentzia bihurtu da Joy, eta pop izar handiei dagokien ikusgarritasuna lortu du. Maila gailen horrek telebista-kate nagusietara eta belaunaldi berriekin konektatzera eraman du, TikTok bezalako plataformen bitartez. Bere emanaldien historiala ikusi besterik ez dago: Newport, Monterey eta Montreal bezalako jaialdi mitikoak, eta Apollo, Carnegie Hall, Village Vanguard eta Jazz at Lincoln Center bezalako agertoki ikonikoak.

Bronxeko Castle Hill auzoan jaioa, musikaz inguratuta hazi zen. Bere aitona-amonek, Elder Goldwirek eta Ruth McLendonek, Filadelfiako The Savettes gospel taldea lideratu zuten, eta bere aita, Antonio McLendon musikari eta konpositorea, Andraé Crouchekin birak egin eta bere errepertorio propioa grabatu zuen. Txikitan R&B klasikoarekin maitemindu zen eta elizako gospel koruan trebatu zuen ahotsa. Geroago, nerabezaroan, Jazza deskubritu zuen Fordham High School for the Arts-en. Bertan, Bokalista Onenaren saria irabazi zuen Jazz at Lincoln Center's Essentially Ellington lehiaketa ospetsuan. 2019an, Sarah Vaughan International Jazz Vocal Competition saria irabazi zuen, eszena profesionalera behin betiko eraman zuen inflexio-puntua.

Informazio gehigarria

Salmenta baldintzak

Nils Petter Molvær - Khmer

Nils Petter Molvær (tronpeta-jotzailea), Eivind Aarset (gitarra-jotzailea), Jan Bang (live sampling-a), DJ Strangefruit (DJ), Audun Erlien (baxu-jotzailea), Rune Arnesen (bateria-jotzailea), Per Lindvall (bateria-jotzailea), Sven Persson (soinu-diseinugilea), Tord Knudsen (argiztapen-diseinugilea)

Nils Petter Molvær Europako jazz garaikideko funtsezko figura bat da, eta lengoaia propio bat ehundu du laurogeita hamarreko hamarkadaz geroztik. Lengoaia horretan, elektronikaren, inprobisazioaren eta soinu-esplorazioaren artean hartzen du arnasa tronpetak. 61 Jazzaldian, bere estreinaldi diskografikoaren, hots, Khmer (1998) obraren berrinterpretazio zoragarria eskainiko digu.

Eskandinaviako jazzaren izen handiekin jo ohi du Molvaerrek, eta nazioarteko artistarik eskatuenetako bat da. Haren musikak azken hamarkadetako jazzaren mugak zabaldu ditu, eta belaunaldi oso bat markatu du. 2023. urtean, Khmer diskoaren 25. urteurrena bete zen. Disko iraultzaile hori mugarria izan zen, eta lurralde berri bat ireki zuen. Lurralde horretan, jazza trip-hoparekin, drum’n’bassarekin, ambientarekin, technoarekin, musika industrialarekin eta musika elektronikoarekin nahasten zen. Diskoaren osagai nagusiak erritmo sendoak, groove taupakariak eta intentsitatez eta berotasunez betetako tronpeta nahasezina izan ziren. Disko hori Norvegiako jazz garaikidearen sorrerako obra da oraindik ere.

 Informazio gehigarria

Salmenta baldintzak

Pat Metheny Side-Eye III+

Pat Metheny (gitarrak), Chris Fishman (teklatuak), Joe Dyson (bateria), Jermaine Paul (baxua)

Pat Metheny, ziur aski, azken hamarkadetako Jazz gitarristarik garrantzitsu eta karismatikoena da. Mende erdi baino gehiagoko ibilbidearekin, oso musikari gutxik baiezta dezaketen zerbait lortu du: bere instrumentuaren soinua etengabe berrasmatzea, bere nortasuna inoiz ere galdu gabe. Bere musika, argitsua eta konplexua aldi berean, berotasun melodikoaren eta esplorazio harmonikoaren artean mugitzen da, inprobisazio askeagoaren eta konposizio zehatzagoaren artean.

1954an jaio zen Kansas Cityn, musikari familia batean, eta zortzi urte zituela hasi zen tronpeta jotzen, hamabi urterekin gitarra bere behin betiko instrumentua izango zela jakin aurretik. Oraindik nerabe, bere jaioterriko Jazz musikari onenekin jotzen zuen, bere estiloa betiko markatuko zuten bluesaren pultsua eta swingaren tradizioa xurgatu bitartean. Hogei urte besterik ez zituela, nazioarteko eszenara egin zuen jauzia Gary Burton bibrafonistarekin batera, eta, ordutik, bere izena Jazz gitarra ulertzeko modu berri bati lotuta geratu da: exekuzio leun eta malgua, bere garaiari aurrea hartzen dion sentsibilitate erritmiko eta harmonikoa, eta mugarik gabeko jakin-mina.

Informazio gehigarria

Salmenta baldintzak

Diana Krall

Diana Krall, zalantzarik gabe, Jazz garaikideko figura garrantzitsu eta maiteenetakoa da. Pianorako duen sentsibilitate apartak, ahots bero eta iradokitzaileak, berezkoa duen dotoreziak eta tonu intimista paregabeak artista unibertsal bihurtu dute. Azken hamarkadetan, Jazzarekiko begirunea ikuspegi moderno eta pertsonalarekin uztartzen jakin du Krallek, eta oso leku berezian kokatu da, Jazz klasikoaren eta musika herrikoiaren artean.

Nanaimon jaio zen, Columbia Britainiarreko (Kanada) hiri txiki batean. Lau urte zituela hasi zen pianoa jotzen, eta hamabost urterekin tokiko jatetxe batean jotzen zuen dagoeneko. Bere aitak, pianozale amorratuak, ondo ezagutzen zituen Fats Waller, James P. Johnson eta Earl Hines bezalako figurak, eta berarengandik jaso zituen aurreneko eraginak musikaren arloan. Beka bati esker, Bostongo Berklee College of Music ospetsuan trebatu zen, eta nazioarteko agertokietara eramango zuen ibilbide bati ekin zion laster.

Berkleetik igaro ondoren, Krall Los Angelesera joan zen, eta han Jazzaren izen handienetako batzuekin harremanetan jarri zen, tartean Ray Brownekin —bere mentorea eta kolaboratzailea bere hasierako proiektuetan—, John Claytonekin edo Jimmy Rowlesekin. 1993an, lehenengo albuma argitaratu zuen, Stepping Out, eta handik gutxira lankidetza emankorra izan zuen Tommy LiPuma produktore ospetsuarekin. Harekin bere ibilbideko disko gailenetako batzuk grabatu zituen: All for You (1995), Love Scenes (1997), When I Look in Your Eyes (1998), The Look of Love (2001) eta Live in Paris (2003).

Informazio gehigarria

Salmenta baldintzak